മാറാന്‍ ഭയപ്പെടേണ്ടതുണ്ടൊ?
മാറ്റത്തെ കുറിച്ചും അതിന്‍റെ പ്രാധാന്യത്തെ കുറിച്ചും നമ്മള്‍ ധാരാളമായി കേള്‍ക്കാറുണ്ട്. മാറ്റം എന്നത്കൊണ്ട് അര്‍ത്ഥമാക്കുന്ന ഏറ്റവും ലളിതമായ വിവിക്ഷ ഇതാണ്: നിലവില്‍ ആചരിച്ച് വരുന്ന ഒരു കാര്യം ഉപേക്ഷിച്ച് മറ്റൊരു രീതി സ്വീകരിക്കുക. അഥവാ ഒരു അവസ്ഥയില്‍ നിന്നും മറ്റൊരു അവസ്ഥയിലേക്കുള്ള ചലനം. ജീവിതാവസ്ഥകളില്‍ അത്തരമൊരു മാറ്റം സംഭവിക്കുന്നില്ലെങ്കില്‍, വ്യക്തികള്‍ക്കൊ സമൂഹങ്ങള്‍ക്കൊ ഒരു പുരോഗതിയും കൈവരിക്കുക സാധ്യമല്ല.
എന്നാല്‍ പലരും മാറ്റത്തെ ഭയപ്പാടോടെയാണ് കാണുന്നത്. മാറണൊ മാറണ്ടെ എന്ന സംശയം ഒരു ഭാഗത്തും മാറുന്നതിന്‍റെ ഭയം മറുഭാഗത്തും നിലയുറപ്പിച്ചിരിക്കുന്നതിനാല്‍, മാറ്റം പലപ്പോഴും ഒരു പ്രഹേളികയായി മാറുന്നു. അത് നമ്മുടെ പുരോഗതിക്ക് മുന്നില്‍ വിലങ്ങ്തടിയായി നില്‍ക്കുന്നു. ഉദാഹരണമായി പുകവലി, മദ്യപാനം, ലൈംഗികാഭാസങ്ങള്‍ തുടങ്ങിയ ദുശ്ശീലങ്ങള്‍ ഉപേക്ഷിക്കാന്‍ പലരും തയ്യാറാവാത്തതിന്‍റെ കാരണം, അത് കൂടുതല്‍ അശ്വസ്ഥത സൃഷ്ടിക്കുമൊ എന്ന ഭയമൊ അല്ലെങ്കില്‍ മറ്റുള്ളവരുടെ വിമര്‍ശനമൊ ആണ്.
മറ്റൊരു ഉദാഹരണം പറയാം. വരുമാനത്തില്‍ വര്‍ധനവ് ആഗ്രഹിച്ച് നിലവിലുള്ള അവസ്ഥയില്‍ നിന്ന് മാറി, ബിസിനസ്സ് സംരംഭം തുടങ്ങിയാലൊ എന്ന് ആലോചിക്കുന്നു. പക്ഷെ പലതും ഭയന്നും സംശയിച്ചും മനസ്സിലുദിച്ച ബിസിനസ്സ് മോഹം മരീചികയായി അവശേഷിക്കുന്നു. റിസ്ക് എടുക്കാതെ ഒരു കാര്യവും സാധിക്കുകയില്ല. പക്ഷെ അത് ബുദ്ധിപൂര്‍വ്വമായിരിക്കണമെന്നതിലെ നിഷ്കര്‍ശപുലര്‍ത്തേണ്ടതുള്ളൂ. അങ്ങനെ ഒരാള്‍ മുന്നോട്ട് പോവുമ്പോഴാണ് മാറ്റത്തിലൂടെ നേട്ടം കൈവരിക്കാനും വരുമാന വര്‍ധനവിനും കഴിയുകയുള്ളൂ.
വര്‍ഷങ്ങളായി ചെയ്ത് വരുന്ന കാര്യങ്ങള്‍ അതേപടി തുടര്‍ന്നാല്‍, എങ്ങനെയാണ് അഭിവൃദ്ധി കൈവരിക്കാന്‍ സാധിക്കുക? മാറുന്നതിനെ നാം പലപ്പോഴും പ്രതിരോധിക്കുകയാണ് ചെയ്യുന്നത്. മാറ്റം എന്നത് യഥാര്‍ത്തില്‍ ഒരു പരിണാമ പ്രക്രിയയാണല്ലോ? അത്തരം പരിണാമ ഘട്ടത്തില്‍ അനിശ്ചിതാവസ്ഥ ഉണ്ടാവുക സ്വാഭാവികമാണ്. ഈ അനിശ്ചിതാവസ്ഥയെ നമ്മുടെ മസ്തിഷ്കം പലപ്പോഴും ഇഷ്ടപ്പെടുന്നില്ല. അതിനാല്‍ തൊഴില്‍ ഉള്‍പ്പടെയുള്ള മേഖലകളില്‍ പോലും മാറാന്‍ മടികാണിക്കുകയാണ്.
ഭയമില്ലാതിരിക്കലാണ് മാറ്റത്തിന്‍റെ പ്രധാന ഘടകം. ജനങ്ങളുടെ പ്രതികരണത്തെ കുറിച്ച ഭയം. ജനം എന്ത് വിചാരിക്കും എന്നതാണ് ഒരാളുടെ മനോനില എങ്കില്‍, പിന്നെ എന്ത് നേട്ടമാണ് നേടാന്‍ സാധിക്കുക? മാറ്റത്തെ കുറിച്ച് ചിന്തിക്കാതിരിക്കാനുള്ള മറ്റാരു കാരണം സ്വന്തത്തെ കുറിച്ച സംശയമാണ്. മാറ്റത്തെ കുറിച്ച് ചിന്തിക്കുന്ന നാം അത് ജീവിതത്തില്‍ നടപ്പാക്കാന്‍ പറ്റുമൊ എന്ന് സംശയിക്കുന്നു. അതുപോലുള്ള കാര്യം മറ്റു പലരും ചെയ്യുന്നുണ്ടാവും. അവരുടെ സഹായം തേടി മുന്നോട്ട് പോവുക.
മാറുന്നതിനെ ഭയക്കാന്‍ വേറേയും കാരണങ്ങളുണ്ടാവം. ലക്ഷ്യത്തെ കുറിച്ച് അവ്യക്തത, പരാജയ ഭീതി, കൃത്യമായ ലക്ഷ്യമില്ലാത്ത അവസ്ഥ ഇവയാണ് വിജയത്തിന് തടസ്സം നില്‍ക്കുന്ന മാറ്റത്തിന്‍റെ ശത്രുക്കള്‍. ഇവയെ ധീരമായി നിഗ്രഹിച്ചാല്‍ മാത്രമെ മുന്നോട്ട് പോവാന്‍ കഴിയൂ. ഭയം മാനസികമായ അവസ്ഥയാണ്. അതിനെ മറികടക്കാന്‍ നിങ്ങളുടെ ഉള്ളകങ്ങളിലേക്ക് നോക്കുക. നിങ്ങളുടെ ഭയങ്ങത്തെ നിങ്ങള്‍ അംഗീകരിക്കുകയും അവ ഓരോന്നായി നേരിടാന്‍ സ്വയം ധൈര്യം പ്രകടിപ്പിക്കുകയും ചെയ്യുക.
ഇസ്ലാം പഠിപ്പിക്കുന്ന മഹത്തായ മൂല്യങ്ങളിലൊന്നാണ് തവക്കുല്‍, മനുഷ്യ സാധ്യമായതെല്ലാം ചെയ്തുകഴിഞ്ഞിട്ടും സംഭവിക്കുന്ന പ്രത്യാഘതങ്ങളെ സമചിത്തതയോടെ നേരിടാന്‍ പ്രാപ്തമാക്കുന്ന ദൈവിക സഹായത്തിലുള്ള അചഞ്ചലമായ വിശ്വാസത്തിന്‍റെ പേരാണ് തവക്കുല്‍. അഥവാ കാര്യങ്ങളെല്ലാം അല്ലാഹുവില്‍ ഭരമേല്‍പിക്കല്‍. ഭൂമിയിലെ അനിശ്ചിതത്വത്തില്‍ രക്ഷനേടാനുള്ള വിശ്വാസികളുടെ പിടിവള്ളിയാണത്. ഭയപ്പെട്ടാല്‍ ഭയം വിട്ട്പോവുകയില്ലല്ലോ? അല്ലാഹു ഒരു വഴി തുറന്ന തരുമെന്ന ഉറച്ച വിശ്വാസമുണ്ടാവുക.
തവക്കുലിന് ശേഷം സംഭവിക്കുന്നത് ദൈവവിധിയാണെന്ന് കരുതി സമാശ്വസിക്കുക. ഒരു വാതില്‍ അടഞ്ഞാല്‍ അനേകം വാതിലുകള്‍ തുറന്ന് തരാന്‍ കഴിവുള്ള മഹോന്നതനായ അല്ലാഹുവിലാണ് വിശ്വസിച്ചിരിക്കുന്നതെന്ന ബോധം മുസ്ലിമിനെ കരുത്തനാക്കുന്നു. ഉറച്ച തീരുമാനവും ഇഛാശക്തിയും മാറ്റത്തിന് അനിവാര്യമാണ്. അറിവ് അതിനെ സ്വാധീനിക്കുന്നു. മക്കയില്‍ നിന്ന് മദീനയിലേക്ക് പലായനം ചെയ്യാന്‍ മുഹമ്മദ് നബി തീരുമാനമെടുത്തിരുന്നില്ലെങ്കില്‍ ചരിത്രത്തിന്‍റെ ഗതി മറ്റൊന്നാകുമായിരുന്നു.
പ്രതിസന്ധിനിറഞ്ഞ കാലമാണിത്. അത് മറിടകടക്കാന്‍ തൊഴിലുടമകള്‍ പല കടുത്ത തീരുമാനങ്ങള്‍ എടുത്തേക്കാം. അങ്ങനെ ചിലര്‍ക്ക് ജോലി നഷ്ടപ്പെടാം. ആ മാറ്റത്തെ ധീരമായി നേരിടുക. ഒരു ജോലി നഷ്ടപ്പെട്ടാല്‍, ജോലി അന്വേഷിക്കുകയാണെങ്കില്‍, ഉടന്‍ ഒരു സി.വി. തയ്യാറാക്കുക. പുതിയ അറിവുകളും നൈപുണ്യവും ആര്‍ജ്ജിക്കുക. സ്വയം സംരംഭം തുടങ്ങുകയാണെങ്കില്‍ അതിന് തയ്യാറാവുക. കുടുതല്‍ പേരുമായി ബന്ധപ്പെടുക. ഇതിലൂടെ പ്രതിസന്ധിയെ മറികടക്കാന്‍ കഴിയും.
